الطيبين

ناس بتشوفهم بصفة مستمرة او متقطعة غالبا مبتحسش بوجودهم حواليك وميفرقش معاك تشوفهم ولا لأ ,ملهمش اي تأثير في حياتك ولا انت بتفيدهم ولا هم بيفيدوك .
عم صابر الراجل الاسمر اللي طول اليوم قاعد علي الدكة اللي قدام بيتهم اعتقد انه خايف يموت في شقته ومحدش يحس بيه عشان محدش بيسأل عنه , كل يوم سواء ايام ما كنت بتروح المدرسة ودلوقتي وانت بتروح الجامعة بتعدي عليه في طريقك الصبح بيسلم عليك وبيسألك عن باباك اللي بقاله 3 سنين مشفوش وانت تقوله هابقي اسلملك عليه وتنسي.
الراجل اللي بيشوف عداد الغاز واللي دايما بيجي في وقت محدش بيبقي موجود في البيت  واللي بيعدي عليك كل شهر من ايام ما كنت لسه في ثانوية عامة واللي اتبسط لما عرف انك دخلت الكلية اللي انت عاوزها ويقولك شد حيلك.
صاحب باباك اللي كنت  بتشوفه لما كان باباك بياخدك تصلي في المسجد وتلاقيه بيبوس ايدك ويديك سواك هدية .
الراجل بتاع الجرايد اللي بيشيلك نسخة جورنال الجمهورية بتاعت المراجعة في ثانوية عامة وبيدعيلك بالتوفيق لما بيدهالك ويقولك متنساش الحلاوة لما تنجح وتنساها .
عم قرني اللي بيقف في كافتريا الجامعة ويوم ما قعد يحكيلك عن ذكرياته مع  دكتور الميكانيكا اللي مات من اسبوع .
عم سعيد العطار اللي لحد دلوقتي بيناديني باسم ابن خالي حسن وفاكرني هو .
عم هشام صاحب المطبعة اللي عمري ما صورت عنده ورقة واللي كنت بكسرله القلل اللي كان بيحطها قدام المحل ايام ما كنت بلعب كورة واللي من ساعة مادخلت الكلية وهو بيقولي يا باشمهندس محمد .
الشاب اللي واقف في السايبر اللي كنت بطبع عنده بيان التغير ولما قالي علي فكرة انا معاكو ومرضاش ياخد مني فلوس الطبع .
موجه العربي اللي قابلته ايام الاعتصام في الميدان واقنعته انه يبطل سجاير .
الراجل اللي واقف في المطعم وااللي بجيب منه فول من 11 سنة تقريبا ولسه معرفش اسمه واللي بيسالني عن كل الاحداث السياسية اللي بتحصل في البلد وخناقاتي معاه علي ان البرادعي ينفع رئيس ولا لأ .


تختلف طبيعة كل شخص فينا , شكل حياته , مكان معيشته ,دراسته , طبيعة شغله ,لكن يمكن احد القواسم المشتركة بينا هم الناس دي
باختلاف اساميهم واشكالهم وطبيعتهم, الناس اللي مش عاوزة منك حاجة واللي ممكن متحسش بوجودهم حواليك اصلا لكن بتفضل فاكرهم وتزعل لو حد منهم مبقاش موجود