21 سبتمبر 2010 اول مظاهرة انزلها في حياتي النهاردة يبقي سنة اولي سياسة ليا مش عارف نجحت ولا لأ بس اللي متأكد منه اني مش هاعيد سنة اولي تاني وهعدي السنة دي ان شاء الله .... كان متنظم وقفة قدام قصر عابدين بنفس تاريخ وقوف عرابي قدام الخديو توفيق لما قاله لن نورث بعد اليوم كان كل الناس متعبية من جمال مبارك وتعامل مبارك مع البلد انها عزبة ابوه وانه هيورثها لابنه وده كان واضح قوي لما خده معاه سفرية أمريكا كأنه بيتحدي الشعب كله.
اتفقت انا وزميلة النضال مني اننا نتقابل في كليتي كلية هندسة وكنا يوميها اول مرة نشوف بعض كنا دايما بنتكلم علي النت وقابلنا صديقي التالت اسلام واتكلنا علي الله ركبنا المترو نزلنا محطة محمد نجيب وما شاء الله مع انها اول مرة مظاهرة ليا بس عرفت المخبرين اللي كانو في محطة المترو منظرهم زي الافلام القديمة بالظبط متغيرش.
وصلنا ميدان عابدين قعدنا نلف كتير عشان كانو قافلين كل المداخل قدام القصر اتعرفت علي شباب من 6 ابريل ولكن المعرفة الاكتر كانت مع صديقي اسلام اللي فضلنا لافين ساعتين مع بعض عشان نوصل اتكلمنا في كل حاجة عشان التوتر اللي كنا فيه لدرجة اني حكيتله علي البنت اللي مش عارف اكلمها في الكلية :) ...الكوميدي انه بعد التنحي سالني اسلام عملت ايه معاها قلتله ولا حاجة قاللي يخرب بيتك ده مصر عملت ثورة في الفترة دي :))
اتفرقنا انا واسلام عن الناس اللي كنا ماشيين معاهم يوميها فضلنا نمشي لغاية ما لقينا ناس قليلة متكردنة دخلنا معاهم كان كل تاريخي بالهتاف اصلا هتاف من التالتة شمال لما كنت ببقي مع التراس في الاستاد بس المرة دي الهتاف كان من نوع تاني بتشتم نظام بتقول رأيك بتكسر خوفك بتشتم رئيس قدام قصره رمزيا ياعني هو مكنش جوه اصلا " هو مبارك عاوز ايه عاوز الشعب يبوس رجليه لا يا مبارك مش ههنبوس بكرة عليك بالجزمة ندوس" نيجي علي بالجزمة ندوس تلاقي الغل كله طلع وهتفنا برضه لن نورث بعد اليوم وبرضه " واخد ابنه معاه امريكا توريث فوري بالبولتيكا رايح بيجيبله التوكيل من امريكا واسرائيل " كنا قليلين مش مؤثرين الناس بتعدي في الشارع تتفرج علينا منظر قد يدعو للاحباط لكنه عمره ما وصلنا كنا.
كل مدة كده نتعب نقوم نوقف هتاف وحد يطلع يقول شعر زي شعبي حبيبي لفؤاد نجم وجحا للجخ بنحاول ننادي للناس يجيو معانا شكلهم كان متعاطف معانا بس كانو لسه بيخافو سمعنا ان محمد عبد القدوس اتضرب وجميلة اسماعيل اتحفظوا عليها ومش عارف مين اعتقل مين افرج عنه حالة غريبة توتر وخوف انك تتمسك وفخر انك بتقول رأيك وحزن علي حالة البلد .
المهم قررنا اننا نمشي الامن فك الكردون كل واحد مشي في طريقه رجعت البيت يوميها كاني مثلا كنت لسه راجع من ميعاد غرامي حالة ارتياح غريبة حاسس بيها حالة فخر ...حسيت اني اقدر اعمل اي حاجة في الدنيا الا اني اكلم البنت اللي معجب بيها :)
بقيت واحد من كتابى المفضلين يا باشا بدون أدنى مبالغة
ردحذفوفعلا بقيت فخور أننا اصحاب ياد انت يابو ورقة ;)
بجد بقى الله ينور يا كبير :))
^__^ بتحرجني يا شامي والله بقي :) حبيبي انت الشرف ليا انا
ردحذفتسلم يا باشا :)
ردحذف