هو كان يوم طويل بالنسبة لي مكنش 24 ساعة كان 40 ساعة من قبلها بيوم بننظم ازاي هنظبط الزيارة وكده الناس اللي رايحة البرنامج هناك ازاي كده يعني, ركبنا الاتوبيس الصبح وصلنا الساعة 11 البلد قرية هادية وجميلة زي باقي قري مصر اللي اكتر حاجة بتميزها مفيهاش تفاصيل كتير ابهجنا اوي اليفط اللي كانت متعلقة "ابيار ترحب بمحمد البرادعي " نزلنا وقررنا نروح الجامع عشان نصلي ونستقبل الدكتور واحنا ماشين في البلد دي كانت من اجمل اللحظات بنسلم علي الناس والناس بتحيينا واحد حلاق عدينا عليه قالنا " حملة دكتور البرادعي منورانا في البلد والله ده حبيبنا " :) الجو كان جميل كده ومشجع وصلنا المسجد شوية والدكتور جه قعد والجميل اول ما قعد واحد سلفي جه سلم عليه وحضنه وباسه جامد منظر ريحني اوي :) الناس قامت تصوره وكده كان في شوية هرجلة في المسجد بس حطلها حد صوت الاذان لما اترفع .
الامام ابتدي الخطبة موضوعها كان الامانة وان الامانة مش بتبقي فلوس بس الامانة ممكن تكون كلمة تصرف مسئولية خلصت الخطبة كان في ناس من اهل القرية متضايقين شوية مش من الدكتور بس من ان الجامع اتزحم قوي الامام حيا الدكتور بعض الصلاة الدكتور قام قال كلمتين بالعدد وحيي الخطيب علي الخطبة وقال ان الامانة فعلا لازم تبقي منهجنا انه بيحيي اهل قريته وبيتمني ان تتحقق مبادئ الاسلام العدالة والحرية والكرامة .
وانطلقنا نمشي في البلد مع الدكتور منظر رهيب عدد الناس مش متوقع البلد كلها نزلت " قولها كويس قولها كويس -البرادعي هو الريس " تكفلت انا بالهتاف القديم شد القلوع" ويا ثوار يا ثوار ريسنا الجاي من ابيار "- البرادعي من مسقط راسه هيكون للشعب امنه وخلاصه " ''ثورة ثورة لحد النصر .. البرادعي رئيس لمصر'' الناس متجمعين حوالين الدكتور فرحانين بيه حد طلع فوق عمارة رمي بونبوني :) اليفط اللي كانت متعلقة .
الدكتور ركب العربية وطلع علي احدي بيوت اهل القرية قعد واتكلم مع الناس في القرية واهالي بلده وبعدين رجع القاهرة
يمكن اكتر حاجة عجبتني النهاردة غير الغدا اللي اتغديناه طبعا ان في حاجة حصلت النهاردة ان الدكتور موجود وشعبيته اهي ومش خايف ينزل وان الناس كلها مستنية نزوله واولهم بقية المرشحين وناس كتير كانت عشمانة ان النهاردة ميعديش علي خير بس عديت الحمد لله وعلي اروع خير
ليست هناك تعليقات:
إرسال تعليق