اخر شهرين من السنة , نفس المظاهر والطقوس بتتكرر كل 5 سنين في نفس الوقت ده , أسماء معظمها محدش سمعه قبل كده منعرفش منهم غير اسمين بيظهرو في الوقت ده وبعدين يختفوا.
بوستر متقطع وملحوظ ان اي مكان متعلق فيه البوستر ده في محاولة لتقطيعه سواء ناجحه او فاشلة , البوستر لراجل خلوق دقنه خفيفة شوية كل الناس بتحبه وبيساعد الناس بجد بس عمر ما حالفه الحظ أو بالأدق الحظ كان مجبر ان ميتحالفش معاه .
ست في اواخر الاربعينات , متصابية صورها متعلقة وهي لابسة نضارة شمس شكلها مستفز لدرجة انها ممكن متخليش الواحد يروح يشارك في العملية أصلا.
مدرس عربي محترم ناس قليلة تعرفه بس بيحبوه بيصمم كل سنة يشارك في اللعبة دي وهو عارف انه مفيش أمل وبيخسر لأنها لعبة بلا أخلاق.
تمشي في الشارع تلاقي حد ملموم حواليه زبانيته بيهللوا وبيهتفوا حبيبكم مين فلان بتأيدو مين فلان وقاعد يسلم علي الناس في الشارع والناس متعرفوش بس مبسوطة انه بيسلم عليهم.
في بلدنا حاجاات تافهة زي دي ممكن تخلي الناس يطمنو لحد ويحطو ثقتهم فيه.
اليافطة القماس المكتوبة بخط الرقعة والوانها زاهية والمتعلقة فوق البيت ال3 ادوار جنب بلكونة الشقة اللي ساكن فيها الراجل اللي مراته ماتت وبيربي ابنه وبنته , معرفش السنة دي يجيب لهم هدوم جديدة في عيد الفطر .
الباب بيخبط فجأة تلاقي حد بيديلك شنطة فيها أرز وسكر وخضار ومنشور دعائي للتعريف بالحزب وسياسته وأفكاره للنهوض بالوطن.
صورة متعلقة لراجل حاسس اني شفته قبل كده , كان نازل في الدورة اللي فاتت بس المرة دي مربي دقنه .
عربيات نقل بيتعدي طول الليل والنهار باختلاف الناس اللي عليها وباختلاف الاسماء اللي بينادوا بيها بس بيتفقو في صيغة الكلام .
سواق الميكروباص اللي في المنطقة واللي معروف بخناقاته الكتير والسباب اللي مش بيسيب بقه لازق علي الميكروباص (الاسلام هو الحل) .
الناس ماشية في الشارع , راكبة المواصلات ,واقفة في الطوابير باختلاف أغراضها , اليفط والدعايا والصور المتعلقة عاملة عليهم مظلة , عاملة غمامة علي الجو محدش منهم مهتم بيها من الاساس يمكن عشان حاسين انها مش فارقة او عندهم الاهم اللي يشغلو بالهم بيه بس وجود الغمامة طاغي غصب عنهم .
بيتفض المولد وبيتحدد مين هيقرر مستقبل الوطن ويحط السياسات , وتفضل اليافطة القماش فوق بيت الراجل اللي مراته ماتت والجديد انه معرفش يجيب لابنه وابنته السنة دي شنط جديدة قبل دخول المدارس.
